Новыя выбухі ў Крыме, раскол між «ДНР» і «ЛНР». Што адбываецца ва Украіне ранкам 16 жніўня

Вось што пішуць пра баявыя дзеянні на 174-ы дзень поўнамаштабнай вайны ва Украіне.

Паводле зводкі Генеральнага штабу Збройных сілаў Украіны, трываюць расейскія ракетныя, авіяцыйныя, артылерыйскія і танкавыя ўдары па цывільных аб’ектах Украіны. Паводле падлікаў ЗСУ, Расея страціла ўжо 43,9 тысячы чалавек, 1880 танкаў, 4152 баявыя браняваныя машыны, 989 артылерыйскіх сістэмаў і 263 сістэмы залпавага агню, 136 сістэмаў супрацьпаветранай абароны, 233 самалёты і 196 верталётаў, 790 беспілотнікаў, 15 караблёў і лодак, 92 адзінкі спецыяльнай тэхнікі і 3049 аўтамабілі і аўтацыстэрны.

ЗСУ зафіксавалі абстрэлы на сіверскім, харкаўскім, славянскім, краматорскім, бахмуцкім, аўдзееўскім, навапаўлаўскім, запарожскім, паўднёвабужскім напрамках. Ноччу абстралялі пяць з дзевяці раёнаў Харкава.

Расейцы спрабавалі наступаць у напрамках Валадзіміраўка-Бахмуцкае і Страпіўка-Саледар, але былі адкінутыя назад. Баі трываюць на напрамках Пакроўскае-Бахмуцкае і Горлаўка-Залізнае (бахмуцкі напрамак) і Стараміхайлаўка-Невельскае (аўдзееўскі). На напрамку Салодкае-Новаміхайлаўка (запарожскі) расейцы «маюць частковы поспех», але баявыя дзеянні трываюць. Спроба штурму ў напрамку Зялёны Гай-Навагрыгораўка (паўднёвабужскі) завяршылася стратамі расейскага боку і адступленнямі.

На валынскім і палескім напрамках (на мяжы з Беларуссю) ЗСУ не бачыць зменаў: па-ранейшаму бачаць трэнаванні Узброеных сілаў Беларусі і пагрозу ракетных і авіяцыйных удараў з тэрыторыі Беларусі. Маніторынгавая група праекту «Беларускі Гаюн» зрабіла вялікі агляд тэхнікі, якую расейцы трымаюць на аэрадроме Зябраўка пад Гомлем – там у ноч з 10 на 11 жніўня бачылі выбухі.

У акупаваным Расеяй Крыме зноў чуваць выбухі. Паведамляюць, што ў Джанкойскім раёне гарыць электрычная падстанцыя. Украінскі дэпутат Аляксей Ганчарэнка тлумачыць: Джанкой – «вароты ў Крым», там вялікая чыгуначная станцыя, праз якую ідуць войскі, боепрыпасы і тэхніка. А кіраўнік Меджылісу крымскататарскага народу Рэфат Чубараў сцвярджае, што трапілі ў вайсковую частку ў сяле Азоўскае Джанкойскага раёну. Паведамляюць таксама пра пажар у пасёлку Майскае пад Джанкоем, хадзілі чуткі таксама пра выбух у раёне Генічаску.

Але ўкраінскі бок пакуль не пацвярджае і не абвяргае ўдары па Джанкоі ці Генічаску – так, аператыўнае камандаванне «Поўдзень» паведамляе толькі пра паражэнне двух апорных пунктаў расейскіх войскаў у Новапятроўцы і Максімаўцы, пункту пастаўкі боепрыпасаў у Сухім Стаўку – усё далёка ад Крыму.

Абноўлена. У Майскім адбылася «дэтанацыя боепрыпасаў», піша расейскі ТАСС са спасылкай на акупацыйныя ўлады. Пра выбухі на электрычнай падстанцыі не пішуць.

New: Elements of the #Luhansk People’s Republic (LNR) militia reportedly refused to continue fighting in #Donetsk Oblast and complained about the grueling pace of offensives outside of Luhansk Oblast.

Read tonight's full report with @criticalthreats: https://t.co/T7j4h4ER2G pic.twitter.com/jykrgJsxzi

— ISW (@TheStudyofWar) August 16, 2022

Амерыканскі Інстытут вывучэння вайны (ISW) адзначае, што элементы «міліцыі ЛНР» адмовіліся змагацца за «ДНР» і наракалі на тэмпы наступу за межамі Луганскай вобласці. Канкрэтна гэтае паведамленне даследчыкі не могуць праверыць, але пішуць, што яно адлюстроўвае вялікі трэнд падзення баявога духу ў «ЛНР», што небяспечна для Расеі – тая шукае новых салдатаў для кампенсацыі стратаў. Раней падобныя звароты запісвалі і сілы «ДНР», што сведчыць аб няпоўнай падтрымцы Крамля «проксі-войскамі».

Брытанская выведка заўважае, што расейскія караблі ў Чорным моры займаюць «максімальна абарончую пазіцыю», а патрулі трымаюцца крымскага берагу – гэта кантрастуе з тым, як расейскі флот паводзіць сябе ў іншых марах у такі час года. Але Чарнаморскі флот Расеі працягвае выкарыстоўваць дальнабойныя ракеты, хоць страціў «эфектыўны кантроль над морам» і свой флагман – крэйсер «Масква».

Малая эфектыўнасць Чарнаморскага флоту падрывае расейскую стратэгію ўварвання, а пагроза штурму Адэсы з мора нейтралізаваная, лічыць выведка Аб’яднанага каралеўства.

З украінскага порта выйшаў чарговы карабель са збожжам – зафрахтаваны ААН карабель вязе з порта Паўднёвы збожжа ў якасці гуманітарнай дапамогі краінам Афрыканскага рога. Гэта, як адзначае BBC, першы карабель, які ідзе непасрэдна ў той рэгіён: ён пойдзе наўпрост у Джыбуці, а груз даставяць у суседнюю Эфіопію.

А ва Украіну прыбылі яшчэ шэсць амерыканскіх гаўбіц М109 ад Латвіі, паведаміў міністр абароны Украіны Аляксей Рэзнікаў. І яны «ўжо паказваюць вынікі на полі бою».

У ноч на 16 жніўня Міністэрства абароны Расеі заявіла пра парушэнне брытанскім самалётам радыётэхнічнай выведкі дзяржаўнай мяжы Расеі ў раёне Кольскага паўвострава. Брытанскі самалёт, як сцвярджаецца, «выцесніў» расейскі самалёт-знішчальнік.

Алесь Наваборскі belsat.eu