Лукашэнка сказаў, што ўсе магчымыя санкцыі супраць ягонага рэжыму ўжо ўвялі. Гэта не так

Аляксандр Лукашэнка 9 снежня прыляцеў у Бішкек на паседжанне Вышэйшай Еўразійскай эканамічнай рады з удзелам кіраўнікоў Расеі, Казахстану, Арменіі і Кыргызстану. Сярод іншага ён разважаў пра санкцыі заходніх краінаў, піша БелТА.

На думку Аляксандра Лукашэнкі, «прымітыўная штампоўка калектыўным Захадам бяздумных пакетных эканамічных санкцый супраць Беларусі і Расеі пачынае заціхаць», бо «ўсё, што можна было забараніць і абмежаваць, няхай нават і сабе на шкоду, нашы контрпартнёры ўжо зрабілі».

Ён лічыць, што санкцыі больш ударылі па саміх ініцыятарах санкцыяў, прывялі да эканамічнага і харчовага крызісу на Захадзе, а хутка ў некаторых краінах прывядуць да палітычнага крызісу.

Гэта няпраўда. Напрыклад, паводле прагнозаў Міжнароднага валютнага фонду, за 2022 год валавы ўнутраны прадукт вырасце амаль ва ўсіх краінах Еўропы. Падзенне будзе толькі ў Беларусі, Расеі і Украіне. На тэрыторыі апошняй ідзе поўнамаштабная вайна, у якой Расея наносіць прыцэльныя ўдары па цывільнай інфраструктуры. Пры тым у Беларусі (якая толькі саўдзельнічае ў нападзе, і тое не наўпрост) прагназуюць падзенне ВУП на 7 %, а ў Літве і Польшчы, якіх рэжым Лукашэнкі любіць вінаваціць ва ўсіх бедах, ВУП мае вырасці адпаведна на 1,8 % і 3,8 %.

Харчовы крызіс мог здарыцца ў бедных краінах Афрыкі, і не праз санкцыі, а праз расейскі напад на Украіну. Энергетычны крызіс у Еўропе сапраўды мог здарыцца, але выглядае на тое, што еўрапейскія краіны падрыхтаваліся да зімы, а ад газавага шантажу Уладзіміра Пуціна больш пацерпіць сама Расея.

Няпраўда і тое, што супраць рэжыму Лукашэнкі ўвялі ўсе магчымыя санкцыі. Кіраўнік Народнага антыктызіснага ўпраўлення, прадстаўнік Аб’яднанага пераходнага кабінету Павел Латушка заяўляў, што многія еўрапейскія палітыкі схіляюцца да думкі, што «можа лепш паспрабаваць з Лукашэнкам дамовіцца». Яны лічаць, што, калі не ўводзіць новыя санкцыі супраць уладаў Беларусі, то гэта створыць глебу для таго, каб Лукашэнка не ўцягнуўся ў вайну супраць Украіны больш актыўна.

Нагодай для заўвагаў Латушкі стала сітуацыя з новым пакетам санкцыяў у сувязі з вайной ва Украіне. Еўразвяз плануе яго прыняць 12 снежня. Раней заходнія медыі паведамлялі, што ў рамках новага пакету абмежаванні будуць уведзены не толькі супраць Расеі, але і супраць Беларусі. Аднак на мінулым тыдні карэспандэнт радыё «Свабода» у Бруселі Рыкард Юзьвяк расказаў, што ў новым пакеце санкцыяў, які плануецца прыняць 12 снежня, Беларусі не будзе.

Алесь Наваборскі belsat.eu

The post Лукашэнка сказаў, што ўсе магчымыя санкцыі супраць ягонага рэжыму ўжо ўвялі. Гэта не так appeared first on belsat.eu.

#Беларусь