Глядзіце, як будуць уручаць Нобэлеўскую прэмію міру. Ужывую на «Белсаце» 10 снежня

Алесь Бяляцкі, заснавальнік і кіраўнік праваабарончага цэнтру «Вясна», стаў у 2022 годзе лаўрэатам Нобэлеўскай прэміі міру. Гэтую прэмію яму пакуль не змогуць уручыць асабіста: ён палітычны зняволены ў Беларусі. Але цырымонію ўручэння прэміі ўсё роўна правядуць – а мы будзем весці жывую трансляцыю і пагаворым са знаёмымі Бяляцкага ў студыі.

10 снежня а 14:30 паводле менскага часу «Белсат» ладзіць адмысловы эфір з наўпроставым уключэннем з урачыстай цырымоніі ўручэння Нобэлеўскай прэміі міру. У нашай студыі з Сяргеем Пелясою паразмаўляем з асобамі, якія добра ведаюць Алеся Бяляцкага. Распавядзем, як ён стаў абаронцам правоў беларусаў, паразважаем ці наблізіць гэтая прэмія вызваленне яе лаўрэата з лукашэнкаўскай турмы, а нас усіх ад дыктатуры.

Глядзець эфір можна на нашым сайце, на Youtube-канале, у мабільных праграмах і праз Smart TV, а таксама праз спадарожнік. Паглядзець цырымонію можна будзе таксама разам з іншымі беларусамі: на супольныя прагляды збіраюцца беларусы Варшавы, Вільні, Лондану, Прагі і Тбілісі.

Нобэлеўскую прэмію міру ўручаюць у Міжнародны дзень правоў чалавека, а таксама ў дзень паўстання нашага тэлеканалу. Нобэлеўскую прэмію міру ў 2022 годзе атрымаў кіраўнік беларускай праваабарончай арганізацыі «Вясна» Алесь Бяляцкі, расейская праваабарончая арганізацыя «Мемарыял» і Цэнтр грамадзянскіх свабодаў з Украіны.

Замест Бяляцкага прэмію паехала атрымліваць ягоная жонка Наталля Пінчук. Бяляцкі застаецца ў няволі ўжо паўтара года (прызнаны палітвязнем), але ведае, што яго ўганаравалі Нобэлеўскай прэміяй.

Алесь Бяляцкі – заснавальнік і нязменны старшыня праваабарончага цэнтру «Вясна», віцэ-прэзідэнт Міжнароднай федэрацыі правоў чалавека (FIDH) з 2007 да 2016 гг. Яго затрымалі 14 ліпеня 2021 года ў межах маштабнай атакі спецслужбаў на праваабарончую супольнасць Беларусі. Спачатку яму выставілі абвінавачанне паводле арт. 342 КК РБ («Арганізацыя і рыхтаванне дзеянняў, што груба парушаюць грамадскі парадак, або актыўны ўдзел у іх») і арт. 243 («Ухіленне ад выплаты падаткаў»), але цяпер яму выстаўленыя іншыя абвінавачанні паводле арт. 228 КК («Кантрабанда») і ч. 2 арт. 342 КК («Фінансаванне групавых дзеяннях, якія груба парушаюць грамадскі парадак»). Бяляцкага ўсё яшчэ не судзілі, а толькі працягвалі тэрмін утрымання пад вартаю. Праваабаронцы прызналі яго палітычным зняволеным.

Алесь Наваборскі belsat.eu

The post Глядзіце, як будуць уручаць Нобэлеўскую прэмію міру. Ужывую на «Белсаце» 10 снежня appeared first on belsat.eu.

#Беларусь